Sofkat berriak

Azterketak prestatzen?

Dokumentazioa bilatu, kontsultatu, irakurri, aztertu..., hainbat gauza egin daitezke sarean, klik sinple batekin. Azterketa garaia hurbiltzen ari dela eta, hona hemen aurkitu ditugun baliabide interesgarri batzuk:

Project Euclid: matematikari buruzko informazioa banatzen duen egitasmoa. 90.000 artikulutik gora ditu.
Primal: giza anatomiako 3D irudiekin osatutako atlasa.Guztira 6.500 iruditik gora.
Anatomy.Tv: gizakiaren gorputzeko 3D irudiak online.
Biology Image Library: biologia eta medikuntzako irudi, ilustrazio eta bideoen biltegia.
Buscaexamen: unibertsitateko dokumentuen biltegia, euren artean: azterketak. Adibidez, UPV/EHUkoak edo Nafarroako Unibertsitatekoak.

Ubunturen azken bertsioa kalean da

Eskuragarri dago Ubuntu 8.04 LTS (Long-Term Support) bertsioa. Jaitsi nahi izanez gero, hemen bertan duzue helbidea.

Wikipediaren bertsio alemana liburu bihurtuko dute

Auzolanean lantzen den entziklopedia ezagunenaren bertsio alemana, Wikipedia, paperean argitaratuko du Bertelsmann argitaletxeak. Liburua, 2007 eta 2008an gehien kontsultatu diren, 50.000 sarrerekin osatuko da. Irailean kaleratuko da eta 19,95 eurotan salduko da ale bakoitza.

Liburuaren Egunean: liburuak zure neurrira argitaratzeko zerbitzua. Bubok.es

Bubok liburuak argitaratzeko web zerbitzua da. Bost pausu erraz eta zehatzak jarraituz gero, gure liburua argitaratzen dute egindako eskariaren arabera. E-liburu eta paperezko formatuan argitaratzen dituzte lanak. Liburu bihurtzeko, dokumentua pdf formatuan egon behar da eta gutxienez 30 orrialde izan behar ditu.

Digg.com-en edukien aldaketa

Digg.com teknologia eta zientziari buruzko albisteak elkarbanatzeko sortu zen 2004an. Ingelesezko web gune honen zabalkundea dela eta, bere ildotik, ezagunak ditugun beste bi egitasmo sortu ziren gure artean: Zabaldu.com eta Meneame.net. Ikerketa baten arabera, gaur egun Digg-en kaleratzen diren berriak aldaketa nabarmenak dituzte. 2006an portadan argitaratzen ziren berrien %80k teknologia lantzen zuten eta 2008an aldiz, %20k besterik ez. Izan ere, negozioen gaiek aurrea hartu diote teknologiari.

Zenbat informazio dago Interneten?

Sarean informazio ugari dagoela, gauza jakina da. Izan ere, datuen hazkundea etengabea da. Gaur egun, informazio kopuru ikaragarriari informazio tsunamia esaten zaio. Baina, zertaz ari gara? Ba al dakigu benetan zenbat informazio dagoen Interneten? Hona hemen datu batzuk:

2006an sortutako informazio digitala 161 exabytekoa izan zen (161 gigabyte bilioi). Hau da, aurreko 5000 urteetan sortutakoa baino gehiago.
Digitalizatutako informazioa, idatzi diren liburu guztiak baino 3 milioi aldiz handiagoa da.
1997an milioi bat web gune zeuden, 2000. urtean 10 milioi, 2006an 105 milioi eta 2007an 155 milioiko kopurua gainditu zen.

Eten digitala izan ote dugu?

Hilabeteko etenaldia izan dugu. Berrien atala isilik gelditu zaigu tarte batez. Aste Santuko opor egunak gutxi zirela eta, luzatu egin dugu deskantsua. Etena izan dugu bai, baina eten digitala izan ote da? Eten digitala ingelesezko digital divide kontzeptutik dator. Estatu Batuetan sortutako termino hau, Clinton presidentearen garaian zabaldu zen, Internetera konektatuta eta konektatu gabe zeuden herritarren artean sortu zitekeen hutsunea eta desberdintasuna azaltzeko.

Multitasking Generation edo M Belaunaldia

Gure gazteak jaiotzaz digitalak dira. Teknologia berriekin batera hazten doaz eta, sarri askotan, eurekin mp3, ipod, mugikorra pakete berdinean datozela dirudi. Jaiotzaz digitalak M Belaunaldia osatzen dute: Mugikortasuna, Multimedia, Multiataza, Multikanal etiketak identifikatzen baitituzte. M Belaunaldia edo Multitasking Generation-en beste ezaugarri grafikoa da, adibidez, telebista ikusten dutela beste gauza batzuk eginez edo irakurtzen dutela hainbat gauza batera eginez. Ikerketen arabera, hainbat gauza batera egiteak, multiatazak gaitzea, onuragarria da sormenerako baina bestalde, arreta gaitasuna ez du lantzen eta informazioa ez da gordetzen.

ProofHQ: dokumentuak taldean berrikusteko aplikazioa

ProofHQ sareko aplikazio da. Honen bidez, dokumentuak igo eta lantalde batekin partekatu daitezke berrikusketak egiteko. Dokumentuak aldaketak jasotzen dituen neurrian, bertsio ezberdinak sortzen dira kide guztiak azken testua onartu arte.

Teknologia berrien alde legala

Iru�eko Cuatrovientos Institutuan XXIII aste kulturala ospatzen ari dira. Hitzaldien artean, otsailaren 14an Jorge Campanillas abokatuak emandako Teknologia berrien alde legala aipatu nahi dugu. Campanillas IKTn zuzenbidean espezializatuta dago eta, besteak beste, jabego intelektuala, p2p aplikazioak eta lizentziak aztertu zituen. Entzuleen jakin-mina bete zuen galderei erantzunez:

Internetetik musika eta pelikulak deskargatzeak isunik al du?
Zinera joan eta grabatu nezake pelikula bat?
Zer da kanon digitala?
Web gune bat egin eta egilearen izena ez badut jakinarazten, zerbait gertatzen da?

Hitzaldian esandakoak entzun nahi izanez gero, hemen lehenengo 40 minutuak.

E-posten baliagarritasuna egiaztatzeko aplikazioa

Blog, gune eta bestelako zerbitzuetan erabiltzaileei e-posta eskatzen zaizkie harpidetzak bideratzeko, galderak egiteko edota formularioak betetzeko orduan. Ikusten ditugun helbide elektroniko asko bereziak izaten dira. Nork ez du izan zalantza e-posta bat ikusterakoan: benetakoa ote da? Dudak argitzeko, Emailvalido sareko aplikazioa dugu. E-postak benetakoak diren egiaztatzen du. Frogatu dugu eta gure gezurrezko helbideak antzeman ditu behintzat.

Iparrorratza: ikasketei buruzko orientazio zerbitzua on-line

Ikasketak hautatzerakoan hainbat kezka sortzen zaizkigu. Zalantzak, galderak, erantzunak non bilatu? Informazioa badago baina sakabanatua. Soluzioa? Iparrorratza orientazio akademikoko zerbitzua on-line. Unibertsitatea.net atariko egitasmo hau galdera-erantzunen doako zerbitzua da eta edozein pertsonak galdetu dezake: ikasle, irakasle, guraso... . Galdera egin, bidali eta Iparrorratza orientazio-taldeak galdera erantzungo du epe motzean, egileen posta elektronikora bidaliz idatzizko erantzuna eta galdera publikoa den kasuetan web gunean ere argitaratuko dute. Sareko konsulta akademikoko zerbitzua, doakoa eta erabilerraza, galdetzen hasiko gara ea orientatzen gaituzten.

Teknologia berriak zientziaren ezagutza sustatzeko

Teknologia berriak zientziaren ezagutza zabaltzeko lagungarriak dira, izan ere informazio trukaketa ahalbidetzen dute. Adibide bi hurreratzen ditugu gaur:

eMolecules 2005ean sortu zen bilatzailea da. Bilaketa-motorrak substantzia kimikoak bilatzen ditu 150 enpresen katalogoetan eta erakunde publikoen datu-baseetan. Guztira, 7 milioi daturako sarbidea da.
citebase Search zientziaren inguruan sortutako aipuen indizea da. Zerbitzuak OAI-PMH arauak betetzen dituzten artxiboetan eprints edo zirriborro elektronikoa diren dokumentuen testua aztertzen du eta aipuen indizea sortzen ditu.

Teknologia berriak hezkuntzan: ikasgela digitalak

Ikasys proiektua kaleratu du Ikastolen Federazioak, hau da, norberak ordenagailu bidez ikasteko sistema. Ikasys hiru tresnaren uztarketaz garatzen da: informatikoa (hardware), aplikazio informatikoa (software) eta estrategia kurrikularra (edukia). Liburu baten tamaina duen ordenagailu eramangarrian egingo dute lan ikasleek eta irakasleek bakoitzaren lan erritmoaren jarraipena egin ahal izango du.

Ikasgela digitalen beste adibide interesgarri bat Terueleko herri txikietan zabaldu zen 2003an. Ari�o herriko Lehen Hezkuntzan hiru gela digital zabaldu zituzten eta ondorioz, irakasle eta ikasleek liburuak, koadernoak, arkatzak, boligrafoak alde batera utzi eta Tablet-ak eta arbel digital interaktiboa erabiltzen hasi ziren. Lau urteko esperientziaren ondoren, urtarrilean Ari�oko lau ikaslek Bill Gates-i erakutsi zioten nola erabiltzen dituzten euren tresnak egunero.

Paulo Coelho eta e-liburuak

Sorreran, liburu digitalak irakurtzeko tresnari esaten zitzaion e-book. Gero, paperezko liburu baten bertsio digitalari ere e-book deitu genion. Gaur egun, hirugarren esanahia ere badu: Internet bidez hedatzeko sortzen den argitalpen digitala. Euskal Herrian ez da praktika zabala e-liburuen argitalpena, hala ere, badaude adibide onak. Egile askok, euren lanak lehenik paperean argitaratzea hobesten dute eta gero gerokoak. Munich-en egun batzuk dira DLD (Digital Life Desing) konferentzia amaitu zela eta bertan, Paulo Coelho-k bere liburuak sarean argitaratzearen onurak azaldu zituen. Bere esperientziatik hamaika gauza ikas genezake.

Google-ismoa

Iratxe Esnaolaren artikulu batekin egin dugu gaur topo. Bertan, Google-n ibilbidearen errepaso bat egiten du: garatu dituen egitasmoak eta baita ere, bereganatu dituen proiektuak gainbegiratzen ditu. Hau da, enpresa politikaren nondik norakoak ezagutu daitezke bistazo batekin. Kuriosoa, bereganatu ezin dituenen kasuan egiten duena, pareko egitasmoa burutu eta konpententzia sortu, beste batzuk bezala. Hala ere, Esnaolaren ustez, desberdintasunak daude enpresen artean, nagusiena: sarea ulertzeko modua.

BAI SOFTWARE LIBREARI

Eusko Jaurlaritzako lehendakariordeak, legebiltzarkide sozialista batek egindako galdera erantzunez, Jaurlaritzan software librea erabiltzea garestia izango zela esan zuen. Hautsak harrotu zituen esandakoak. Ondorioz, Gorka Juliok Eusko Jaurlaritza eta software libreari buruzko gertakariaren aurrean, software librearen alde gaudela adierazteko proposatzen digu gure gune, wiki eta blogetan goian azaltzen den botoia jarriz. Erabili!

Padicat: Kataluinako web artxiboa

I�aki Agirrek, NUPeko irakasleak, aspaldi eman zuen Padicat egitasmoaren berri. Padicat, Biblioteca de Catalunya-k bultzatzen du eta Kataluinako ondare digitalaren artxiboa da. Kataluinako webgintza artxibatzea da bere helburua, Internet-en oroimena izatea. Egunotan jakin izan dugu, International Internet Preservation Consortium-ek Padicat egitasmoa ereduzko web artxibo izendatu duela. Izango ote du Euskal Herriak ondare digitalaren artxiborik inoiz?

Kalitatearen astea Euskarazko Wikipedian

Euskarazko Wikipedian Kalitatearen astea ospatzen ari dira asteon eta proposamen bat bideratu digute Wikipediako lagunek: urtarrilaren 14tik 20ra bitartean artikulu berriak sortzeari utzi eta jadanik idatzita daudenak hobetzera gonbidatu gaituzte. Beraz, nahi duenak honakoak landu ditzake:

	Ausazko orrialde baten paragrafo bat gehitu.
	Zirriborroak eta artikulu laburregiak osatu.
	Wikitzeko dauden artikuluak wikitu.
	Zuzentzeko dauden artikuluak zuzendu.
	Kalitatezko 100 artikulu lortzen lagundu.

Linux instalatuta duten portatilak salgai

Orain dela sei hilabete, Lenovo enpresak Linux instalatuta izango zuten eramangarriak kaleratuko zituela iragarri zuen. Gaurtik aurrera, ThinkPad T61 eta R61 ordenagailuak salgai jarriko dituzte SUSE Linux Enterprise Desktop 10 instalatuta. 950 dolarretan salduko dira eta Lenovo berak, emango du laguntza teknikoa hardware eta sistema eragilearen arazoak konpontzeko.

Wikipedia, wifia eta egosearch-a: auto-ilara baten entzundakoa

Auto-ilara baten geldirik geundela, irratia piztu eta Radio Euskadiko Graffiti saioan Internet-i buruzko bitxikirekiak entzun genituen. Ba al dakizue Gabonetako apaingarriak eragina dutela WiFi konexioan? Errezepzioa zailtzen omen dute. Egosearch edo norberaren izenari buruzko bilaketa egitea Internet-en, Google-n erabiltzaile gehienak egiten dutela? Azkenik, Wikipedia kazetari askoren iturri nagusia bihurtu dela eta kexu agertzen ziren, informazioak akatsak omen dituelako. Horrek konponbide erraza du, aurkitzen dituzten okerrak beraiek zuzentzea, ezta?

Personas: Firefox pertsonalizatzeko hedapena

Personas izena du Firefox pertsonalizatzeko kaleratu den hedapen berriak. Urte bukaeran ohikoak diren apaingarriak edota dekorazio kontuak gustukoak baditugu, gure nabigatzailea ere kolorez jantzi dezakegu gaiak aldatuz: urte sasoiarekin bat datorren irudia, gure umorearen araberakoa edota gogokoa dugun aurkezpena aukeratu besterik ez dugu.

PanImages: irudi-bilatzailea euskaraz

PanImages irudi bilatzailea da. Aplikazioak, Flicrk eta Google-ko irudien artean bilatzen du eta Borja Ariztimu�ok, euskal filologiako ikasleak, egindako lanari esker bilatzailearen gunea euskaraz kontsulta daiteke. Sareko zerbitzu honen ezaugarri adierazgarriena hauxe da: irudiak bilatuz gain, bilatzen dugun etiketaren itzulpena ematen digu hainbat hizkuntzatan. Iruditan duzue egin dugun froga, "Olentzero" bilaketaren emaitza.

Irratia.com: basque digital shepherds� meeting

Irratia.com-ek bere 100. emankizuna Bilboko Kafe Antzokian ospatu zuen abenduaren 5ean. Jabi Zabalak eta Patxi Gaztelumendik sortu eta gidatzen dute Irratia.com eta euren saioek egunean jartzen gaituzte, euskal sareko berri-berrienak ezagutarazi eta azalduz. 100. emanaldirako prestatu zuten iragarkia ikusi ahal duzue, merezi du.

Sareko aplikazio erabilgarriak

Dokumentuen formatua aldatzeko, kameleoiak imitatuz, Zamzar aplikazioa erabili daiteke. Irudi, bideo, testu edota musika formatuko dokumentuen sareko bihurgailua da. Erabilera libreko aplikazio honek lau pausutan aldatzen du dokumentuen formatua, guk nahi dugun eredura. Beti ere, 100 Mb baino gutxiago baditu.

Windowns eta MacOsX aplikazioen baliokideak Linux-en.

Gaur, Windows-en erabiltzen ditugun aplikazioen ordezkoa bilatzen ibili gara Interneten Linux App Finder bidez. Bertan, Windows eta MacOsX aplikazioen baliokideak topa daitezke Linux-erako. Baina, behar duzuna aurkitzen ez baduzu, hona hemen beste aukera bat: Alternativas libres. Orain zure esku dago, ausartu zaitez eta erabili Linux.

Software libreari buruzko lehiaketa ikasleentzat

Google-k azken hiru urteetan Google Summer of Code lehiaketa antolatu izan du unibertsitateko ikasleentzat. Konkurtsoaren emaitza onak direla eta, software librearen lehiaketa berria antolatu du Google-k bigarren hezkuntzako ikasleentzat: Google Highly Open Participation Contest. Helburua, ikasleen artean kode irekiko softwarearen garapena bultzatzea da.

Creative Commons: lagun bila

Creative Commos-ek bost urte beteko ditu abenduan. Urtebetetzea ospatzeko lagun bila dabiltza. Ez, ez dute jai erraldoi bat antolatu. CC lizentzien ezagutza bultzatu nahi dute. Horregatik, Facebook, MySpace eta Flickr-en bidez, Creative Commos zer den jakinarazi, azaldu eta erabilera hedatzeko asmoa dute. Abenduaren 15erako 50.000 lagun biltzea da helburua.

Slideoo.com: argazkiekin jolasean

Flickr-en argazkiak badituzu, aurkezpenak egiteko sareko aplikazio aproposa da Slideoo. Zure kontuaren izena sartu, aurkezpenaren hobespenak adierazi, argazki kopurua zehaztu eta laster baten azalduko zaizu irudia. Aurkezpenaren kodea kopiatuz egindakoa ager dezakezu hainbat tokitan. Argazkiekin jolasteko baliabide aproposa. Iruditan duzue adibide bat.

GNU/Linux eta software askea ikastaroa euskal idazleentzat

GNU/Linuxen inguruko ikastaroa antolatu dute Euskal Idazleen Elkarteak eta UEUk. Ikastaroaren helburua da: GNU/Linux sistemen abantailak hurbiltzea eta haren zailtasunen mitoa bertan behera uztea. Instalazioa, eguneroko kudeaketa, programa bateragarri erabilgarrienak... aurkeztuko dira, batez ere idazleen interesekoak izan daitezkeen puntuei erreparatuz. Laburbilduz, Microsoften morrontzari ihes egin nahi dion edonorentzat zerbait interesgarria eta ezagutza teknikorik eskatzen ez duen ikastaroa.

Scitopia.org: zientzia eta teknologia dokumentazio bilatzailea

<3> <3>

Gaur aurkezten dizuegun bilatzailea zientzia eta teknologia gaietarako erabilgarria da: Scitopia.org. Scitopia informazio bibliografikoa bilatzen duen plataforma da, ez da datu-basea. Bilatzaileak hamabost erakundek sortutako dokumentu eta artikuluen artean bilatzen du baita Estatu Batuak, Europa eta Japoniako patente agentzien informazioan. Guztira, hiru milioi dokumenturen artean bila ibiltzen da eta lehen erreferentzia 1874 urtekoa da.

Podcasting hizkuntzen irakaskuntzan

UEUk 2007ko udazkenerako ikastaroak antolatu ditu eta horien artean Podcasting Hizkuntzen Irakaskuntzan ikastaroa dago. Podcasta audio eta bideo edukiak zabaltzeko era bat da. Sindikazioa erabiliz audio eta bideo edukiak hedatzen dira eta erabiltzaileak eduki horietara harpidetzeko aukera du. Tresna hau ezagutzera emateko antolatu dute ikastaroa. Hori bai, parte hartzeko informatikan erabiltzaile mailako ezagutza arrunta beharrezkoa da.

Aurki batzailearen aurpegi berria

HUHEZIko irakaslea den Joxe Aranzabalek, Aurki.com batzailearen inguruan egindako ikerketa kaleratu du. Azaltzen digunez, Aurkiren erabiltzailea honakoa da: gizonezkoa, gipuzkoarra, gaztea, bi egunez behin kontsultatzen du Aurki, euskal iturriak aztertzeko erabiltzen du eta gehiengoak beste batzaileren bat ere badarabil.

ng@nx@2 = Tekno-yonkiak

Urriaren 9an, TVE-ko Documentos TVn "ng@nx@2" dokumentala eman zuten. Teknologia berriek, batez ere gazteengan, duten eragin kaltegarriak kaleratu zituzten. Erbinnuriaren aztarnak blogean ere, egun batzuk dira antzeko gaia aipatu zutela, Interneten inguruko dependentzia aipatu zuten, izaera hori identifikatuz: tekno-yonkia. Zu ere tekno-yonkia zara?

Web semantikoa minuskulaz, mikroformatuak eta beste teknologia

UEUk antolatuta, urriaren 17tik 31arte: Web semantikoa minuskulaz, mikroformatuak eta beste teknologia ikastaroa izango da Eibarren, Gorka Julioren eskutik. Web semantikoaren ideia gauzatzeko aukera urrun ikusten da oraindik baina Interneti balio semantikoa ematen dioten zenbait teknologia sortzen hasi dira. Adibidez: mikroformatuak. Mikroformatuak gaur egungo Interneten erabiltzen diren estandarrak erabiliz bertan dagoen informazioari zentzu semantiko bat emateko jaio dira. Hauek ezagutu eta nola erabili ikasteko aukera duzue UEUk antolatutako ikastaroan.

Joost 1.0: telebista birtuala guztiontzat

Joost telebista eta bideoak ikusteko erreminta da. P2P-n oinarritutako zerbitzu honen helburua, kalitatezko produktuak eskaintzea da, batez ere bideoen kasuan. Izan ere, YouTube-ren konpetentzia bezala kaleratu zen. Orain arte, Joost-en zerbitzua gonbidapenez erabili zitekeen. Egun batzuk dela 1.0 bertsioa kaleratu dute eta edozeinek deskargatu dezake bertsioa. Gaur egun, 250 telebista-katek eskainitako hamabost mila programaz osatutako katalogoa du.

Accessibar: bisitatzen dituzun web guneak zure gustura moldatzeko

Gustu kontua da, baina sarri askotan Interneten gabiltzala, bisitatzen ditugun guneen itxura ez zaigu gustatzen. Kolorea aldatuko genuke, letra tamaina, bistaratze modua, ... . Firefox-en hedapena den Accessibar-en bidez, bisitatzen ditugun atarietako bistaratze parametro batzuk birmoldatu daitezke. Transformazioa ez badugu gogoko, jatorrizko irudira bueltatu besterik ez dugu.

Hacker bila

CodeSyntaxen lan egiteko hacker baten bila dabiltza. Betebeharrekoak: ingelera eta oinarrizko teknologiak menderatzea (programazioa, RDBMak eta SQL). Kontutan izango dira baita: iniziatibaduna izatea, Interneten inguruko jarrera aktiboa edukitzea eta abstrakziorako gaitasuna izatea. Curriculumak bidaltzeko helbidea: garaolaza abildua codesyntax puntu com

Software librea: sistema, sarea, segurtasuna eta web-aplikazioen inguruko ikastaroa

Aurten ere, aurreko edizioen arrakasta ikusita, UEUk eta Asmoz Fundazioak Software librea: sistema, sarea, segurtasuna eta web-aplikazioak izeneko ikastaroa antolatu dute elkarlanean. Ikastaroan Linux-en atal ezberdinak aztertuko dira. Besteak beste, sistemaren administrazioa, segurtasuna eta eduki digitalen argitalpena. Informatikan ezagutza minimo batzuk izatea nahikoa da ikastaroa egin ahal izateko. On-line izango denez, etxetik, lantokitik, ... gustukoen duzuen lekutik egiteko aukera aparta.

Lurking: partaidetza pasiboa Interneten

Hizpide aldizkariaren 64. zenbakian, Interneten sortutako talde eta komunitatetako kideen partaidetza pasiboari buruzko artikulua kaleratzen du I�aki Muruak. Bertan, HABEren sare telematikoan parte hartu duten irakasle jakin batzuen partaidetzaren nondik norakoak azaltzen dira. Gehiengoak partaidetza isila eta absentea azaldu du. Jarrera hauen zergatia aspalditik ikertzen ari diren arren, ez dakigu harridura sortzen duten, baina bai zer pentsatu.

Opor egunetako esperientziak: microblogging

Bueltatu gara eta lehenbizi, sarean murgildu gara. Amaraunean igerian gabiltzala, oporretan microblogging-a probatzen ibili direnen berri izan dugu. Baina, zer da microblogging-a? Teketenek azaltzen duenez: "Internet-en sortu berri diren komunikazio tresnen bidez, adibidez Twitter, momenturo zer egiten ari zaren adierazteko gune bat. Web eta mugikorren bidez egin daiteken informazio trukaketa da." Beraz, microblogging-a: blog, sare sozial eta tresna mugikorren arteko konbinazioaz sortutako fenomenoa da.

Gu ere oporretan

Heldu zaigu eten bat egiteko unea. Softkat-en berrien atalak oporrak hartzen ditu. Bueltatzeko kontua badugu, ordea. Bitartean, ondo bizi!

3D Mailbox: e-posta irakurtzeko modu berria

Gure postontzia Miamiko hotel bat da. Mezuek, harrera-gunearen kontrola pasatu behar dute bertan ostatua hartzeko. Barnean egokitzeko, dutxa bat (spam-en aurkako filtroa). Igerilekuan (sarrerako-ontzia) ibiliko dira, erabiltzaileak irakurri arte. Gero, hamakan etzanda egoteko aukera izango dute. Deskantsua funtsezkoa izango da, izan ere, marrazoz jositako hondartzara (spam-en kasuan) bidal ditzakete edo izozgailuan mantenduko dira, beraiekin zer egin erabaki arte. Denbora-pasa uneak gure e-posta irakurriz batera.

Friki baten bila

Malagan kokatuta dagoen Parque Tecnol�gico de Andaluc�a-n lan egiteko friki baten bila dabiltza. Zu al zara? Kafea dohainik dela argitzen dute behintzat. Eskaintza ezin hobea, ezta?

Software Libreari buruzko II. Unibertsitate Lehiaketa

Software Libreari buruzko II. Unibertsitate Lehiaketaren berri izan dugu. Sevillako Unibertsitateak bultzatzen duen lehiaketa honek, irailaren 15ean zabalduko du izen-emate epea. Lehenengo edizioan 135 ikaslek parte hartu zuten eta 93 proiektu aurkeztu zituzten. Besteak beste, Deustuko eta Mondragon Unibertsitateko ikasleak ere aurkeztu ziren lehiaketara. Irabazleek 1.000 � saria eskuratuko dute eta finalistek, berriz, 400 �.

RSS jarioen eragina web guneen bisita kopuruetan

Sustatuk kaleratu ditu 2007ko lehen hilabeteetako bisiten emaitzak. Bisita kopuruez gain, erabiltzaileen nabigazio hizkuntza eta nabigatzaileen inguruko datuak azaltzen dizkigute. Datu interesgarriak, bilakaera eta joerak aztertzeko. Web guneak dituzten bisitak hainbat tokietatik bideratzen dira: zuzenean, bilatzaileetatik eta baita RSS harpidetzetatik. Internet neurtu eta aztertzen duen AT Internet enpresak kaleratu duenez, web gune batek bere RSS harpidetzen bidez jasotako bisiten kopurua oso txikia da. Orokorrean, bisita guztien %1,8 besterik ez. Neurketa, 2007ko maiatzean egin dute eta 53 web gune aztertu dituzte.

Teknologia berriak irakaskuntzan: e-skola?

BIGEk, Bizkaiko Gurasoen Elkarteak, sortutako gunean Sarekiden irakurri dugu berria: Teknologi berriek familiak eta irakasleak hurbiltzen dituzte. Zertan oinarritzen da hurbilpena? Zehatz-mehatz azaltzen digute: " Zornotzako Urritxe Ikastetxea, Portugaleteko Repelega eta Getxoko Julio Caro Baroja, hain zuzen ere, gurasoei haien seme-alabei buruzko informazioa Internetetik ematen hasi dira: besteak beste, espedientea ikusi, irakasleekiko portaera behatu, ikastetxean bertan gertatzen dena ezagutu baita liburutegitik liburu bat erreserbatu egin dezakete gurasoek." E-skola: guraso eta eskolaren arteko harreman birtuala...?

OpenXML ez, kanpaina

OpenXML, Microsoft-ek Office2007rekin kaleratu zuen XML formatua da. Formatua Microsoft Office bertsio zaharrekin eta Open Office-rekin ere bateratu daiteke. Azken hilabeteetan Microsoft, OpenXML formatua ISO estandarra bihurtzeko lanetan ari da. Honen aurrean, software librearen aldeko mugimenduak kontrako kanpaina jarri du martxan: OpenXML, ez. Kanpaina honen bidez, Microsoft-en azpikeria salatzen da eta ISO estandarra onar ez dezatela eskatzen da. Arrazoi nagusiak hiru dira: OpenXML ez da irekia, ez da estandarra eta ez da XML.

Wikiloc: oporretan ez galtzeko GPSren gehigarria

Oporren usaina, oporrak bai. Nora joan? Hori bakoitzaren esku utziko dugu. Baina, oporraldian GPS erabiltzeko asmoa baduzue, hona hemen zerbitzu aproposa: Wikiloc. Wikiloc mashup bat da, hau da, beste web aplikazio batzuetatik abiatutako zerbitzu berria eta osatua. Web zerbitzuak ia 30.000 kokapen identifikatuta eta 5.000 erabiltzailetik gora ditu. Doako web zerbitzu honen bidez, GPS ibilbideak era errazean eta azkarrean, aurkitu, argitaratu eta partekatu ditzakegu. Aplikazioak 2006an Google-k antolatutako Google Maps-entzako Mashup saria irabazi zuen.

GNU GPL lizentziaren 3. bertsioa

GNU GPL (General Public License) softwarea askearen banaketa eta erabileran lizentziarik zabalduena da. 16 urte pasa dira bigarren bertsioa kaleratu zenetik. 3. bertsiorako bidea 2006ko urtarrilean hasi zuten eta 2007ko ekainaren 29an aurkeztu dute emaitza. Bertsio berriak software patenteen inguruko berrikuntzak ditu, adibidez, GPL3 lizentziadun softwarea erabiltzeak, software horrek estaltzen duen edozein patenterako behin betirako eta doako baimena ematea.

Erabiltzaileen % 40k ez du eragiketarik amaitzen erakunde publikoen web guneetan

Xperience Consulting aholkularitzak egindako ikerketaren arabera, erakunde publikoen web guneetara sartzen diren erabiltzaileen artean, hamarretik lauk ez dute lortzen nahi duten eragiketa burutzea. Beraz, erabiltzaileek ez dute bukatzen online hasitako tramiterik. Ikerketaren arabera, erabiltzailea erraz hurbiltzen da iturrira, web gunera, baina orokorrean, atari instituzionaletan informazio bilaketa eta tramitazioa ez daude erabiltzaileen betebeharren arabera egituratua. Aipatzen dutenez, hizkera herrikoia duten guneak dira arrakastatsuenak. Adibidez, Asturiaseko Gobernuarena, Kataluinako Generalitatearena edo Pozueloko Udaletxearena. Eta Euskal Herrian?

Muskizko liburutegiaren katalogoa hurbilago Opensearchfox gehigarriarekin

Firefox-en gehigarria den Opensearchfox-ek, tresna-barran bilaketa robotak gehitzeko aukera ematen digu, bilaketa egokiak eta erosoagoak ahalbidetuz. Asmo horrekin, Muskizko Udal Liburutegiak doako gehigarria inplementatu du bere katalogoan kontsultak egiteko, liburutegiko web gunea bisitatu barik. Beraz, Firefox nabigatzailetik zuzenean bilaketak egin ditzakegu Muskizko Udal Liburutegian. Oinarrizko lau pausu jarraitu behar direla azaltzen dute liburutegiko arduradunek: Firefox instalatu, liburutegiaren katalogoa txertatu Firefox nabigatzailean, bilaketa egin eta azkenik, zortea izan bilatzen duguna aurkitzeko.

Ikonoak: blog, web gune edo programa erabiltzaileentzat erreminta grafikoak

Blog, web gune, programa edo aplikazioetan aurkitzen ditugun ikur grafikoek, hau da, ikonoek, guneetan eskuragarri dauden aukerak adierazten dizkigute. Diseinu kontuetan garrantzitsua izaten da behar den iruditxoa aukeratzea eta Aingeru Digitalean ezagutu genuen lagungarria izan daiteken Iconlet: ikono bilatzailea. Lizentzia libreekin banatzen diren 40.000 ikono artean gure gustukoa aukeratu besterik ez dugu. Ikono bilatzaileaz gain, badaude beste hainbat gune ikonoak lortzeko: D-poit Apple-n erabiltzaileentzat, Yukei blogarientzat, Iconfactory diseinatzaileentzat, DesdeGuate Wordpress erabiltzen dutenentzat, besteak beste. Aukera zabala beraz.

Resize Your Image: argazkien tamaina doitu online

ResizeYourImage argazkien tamaina moldatzeko sareko aplikazioa da. Doakoa da eta hiru pausu jarraituz, irudiak doitu ditzakegu: irudia igo, doitu eta emaitza jaitsi berriz gure ordenagailura. Erraza eta sinplea.

EuskalGNU gunea berrituta

EuskalGNU gunea berritu dute. Aldaketen artean, CMS berri bat erabiltzea erabaki dute: Joomla! Diotenez, Joomla CMS dotorea da, kudeatzeko erosoa eta GPL lizentziapean banatzen da. Gunea osatzen eta edukia betetzen ari dira EuskalGNUn, aurreko dokumentazioa eta bestelakoak berreskuratzen ari baitira. Baina kaleratutako emaitza garbia eta polita da. Sartu eta ikusi besterik ez duzue.

Safari nabigatzailea Windowserako

Apple-ko zuzendariak, Steve Jobs-ek, Safari3 nabigatzailea aurkeztu zuen ekainaren 11n. Safari nabigatzailerekin Internet Explorer-en nagusitasunari aurre egin nahi dio Apple-k. Horretarako, Windows-en erabili ahalko den nabigatzailea egin du, betiko Safaritik abiatuta. Urrian kaleratuko dute behin betiko bertsioa, baina frogatu nahi duenak, dohainik jaitsi dezake Safari3 softwarea Windows XP eta Vista-rako.

Toorgle: BitTorrent sareko fitxategiak aurkitzeko bilatzailea

Toorgle BitTorret sareko fitxategiak erraz topatzeko baliogarria den bilatzailea da. Izan ere, BitTorrent sareko fitxategiak trukatzea ahalbidetzen duen sistemak baditu berezitasun batzuk: abiadura handia eskaintzen du fitxategiak eskuratzeko orduan baina bezeroek ez dute bilaketak egiteko aukerarik, erabiltzaileak bere kasa bilatu behar du torrent izeneko fitxategia eta nahi duena jaitsi. Horregatik, torrent fitxategien bilaketa egiteko, Google moduko bat izan nahi duen web gune bat jarri dute abian: Toorgle.

Wikiak: azalpen grafiko azkarra eta erraza

Wikia zer den azaltzen duen bideo bat ezagutu dugu Zabalduren bitartez. Egileen ustez, wikiak errazak dira erabiltzeko baina zailak azaltzeko, horregatik landu dute bideoa. Commoncraft gunean dago eta 4 minutu eskasean, argi adierazten dute wikiak zer diren eta nola lantzen diren. Euskarazko azpitituludun bertsioa ikusteko klik egin berriaren izenburuan. Karrajuan dioten bezala: "Honekin baten bati duda geratzen bazaio, azaltzeko modu bakarra okurritzen zait. Egitea. Yeaaaah!"

Geonames: toki-izenen datu-base global eta irekia

Geonames Internet bidez erabili daitekeen toki-izenen datu-basea da. Gaur egun, 8 milioi erregistro kokatuta ditu erabiltzeko eta deskargatzeko prest, egitasmo irekia baita. Besteak beste, Geonames elikatzen duten iturriak dira: Tagzania, Microsoft Popfly, Slide eta LinkedIn. Hala ere, datu ofizialak ere barneratzen ditu. Esaterako, Gipuzkoako datu geografiko zehatzak, euskarazkoak eta ofizialak, Gipuzkoako Foru Aldundiko b5m bulego geografikoaren ekimenez. Modu honetan, wikipedia geografikoa osatzen dela esan daiteke. Toki bakoitzeko informazioak: koordenatuak, banaketa administratiboak, kode postalak, herriak, ordu-zonak, ..., batzen du.

Euskarazko baliabideak Interneten, hitzaldi praktikoa

Maiatzaren 31n, arratsaldeko 18:00etan Zumaiako Foronda Kultur Etxean Euskarazko baliabideak Interneten hitzaldi praktikoa izango da. Elhuyar Fundazioko Proiektu zuzendaria den, Josu Wali�o izango da hizlaria eta mintzaldiaren helburua, Interneten euskaldunok eskura ditugun baliabide interesgarriak eta erabilgarriak ezagutzea da. Besteak beste: hiztegiak, entziklopediak, corpusak, web guneak eta jarioak. Saioa praktikoa izango da, trebatzeko saioa beraz, ordenagailuarekin euskaraz aritzeko dauden aukerak zeintzuk diren, nola eskuratu, instalatu eta erabili ahal diren ikasteko aproposa.

Softwarearen lokalizazioaren inguruko ikastaroa

UEUren eskutik uztailaren 9tik 11ra bitartean, Eibarren Softwarearen lokalizazioa ikastaroa izango da. Irakasleak Librezaleko kideak izango dira eta ikastaroaren helburuak honakoak dira: softwarearen lokalizazioan aritzeko ezagutza zabaltzea eta egondako esperientziak partekatzea. Azken urteotan arrakasta handiz lokalizatu dira hainbat produktu euskarara, baina softwarearen lokalizazioa itzulpenetik harantz doa. Hitzak itzultzeaz gain beste datu eta metadatu asko egokitu behar dira: datak emateko eredua, esaldien kokapena bete beharreko eremuekiko eta abar. Beraz, lokalizatzeko prozesua ezagutzeko, lantzeko eta lokalizatzeko softwarea identifikatzeko aukera Softwarearen lokalizazioa ikastaroan.

Loop: dokumentuak pdf bihurtzeko Firefox nabigatzailetik

DrawLoop enpresak Firefoxentzat plugin enpresak Firefoxentzat plugin berria kaleratu du. Instalazioa doakoa da eta behin instalatuta, sisteman ditugun artxiboak erraz bihurtuko ditugu PDF. Erreminta sinple eta erabilgarria da, izan ere, nabigatzailetik irten gabe sarean dauden dokumentuak pdf bihurtzea ahalbidetzen du. Horrela, tresna-barran azalduko den ikonoaren bidez interesatzen zaigun web gunearen helbidea gehitu eta pdf bihur dezakezu, baita pdf dokumentu bat sortu artxibo eta helbide desberdinak konbinatuz.

Informatikari Euskaldunen Bilkura (IEB07) bukatu da eta... .

Atzo hainbat gauza entzun ziren IEB07-n. Internet-en bilakaera eta errealitatea ezagutzeko baliagarriak izan ziren hitzaldiak eta web 2.0 esperientzien zein software produktuen aurkezpenak praktikoak eta baliagarriak izan ziren. Konbinazio ona: ideiak, iritziak, esperientziak eta produktuak partekatzea. Joxe Aranzabalek web 2.0 teknologiak sozialak direla azpimarratu zuen, ikerketa iturriak hurreratu egiten dituztela, ezagutza partekatzea ahalbidetzen dutela eta harremanak garatzeko eta zehaztasunera joateko balio dutela. Gorka Juliok mikroformatuekin txundituta utzi gintuen. Gari Araolazak Internet-en euskararen presentziari buruzko hausnarketa kaleratu zuen. Iratxe Esnaolak atomizaziotik artikulaziora jo behar dugula azaldu zuen: euskarazko edukiak Internet-en artikulatuz eta Jatsu Argaratek web garapen arineko tresnen ezaugarriak azaldu zituen. Saio praktikoetan aurkeztutako esperientziak eta software produktuak, Web 2.0ren erabilgarritasuna zertan gauzatu daitekeen ezagutzeko egokiak izan ziren. Ezagutu, ikusi, ikasi, hausnartu, ..., parte hartzaile bakoitzak bere probetxua aterako zion atzoko bilkurari. Eta hemendik aurrera zer? Iban Arantzabalen ustez, gure Web 2.0 etorkizunaren klabea Patxi Gaztelumendik bota zuen mahai-inguruan: lana, lana eta lana.

Informatikari Euskaldunen Bilkura (IEB 07) badator eta... .

Maiatzaren 10ean ospatuko den Informatikari Euskaldunen Bilkurarako guztia prest dago. Hitzaldiak eta aurkezpenen berri jakin nahi izanez gero, helbide hauetara jo dezakezue: http://www.unibertsitatea.net/blogak/ieb_07 eta www.ueu.org. Joatekotan bazarete, besteak beste, kotxea konpartitzeko aukera ere baduzue. Kotxean elkarrekin! ekimena ere martxan jarri baitute: http://blogari.net/ueu365. Eta horretaz gain, Marrapuntu gunean bilkurari buruzko inkesta zabaldu dutela ikusi dugu, parte-hartzea zabalik dago oraindik: botoa eman edo iruzkin berriak plazaratzeko. Momentuz, inkestaren emaitzen arabera, bilkura interesgarritzat jotzen da. Ez ote da ezer falta? Zerbait soberan dago agian?

Infoxikazioa

Informazio eta komunikazio teknologien sasoi honetan, informazioaz gain, baliabide zein kontzeptu berriak nabarmen hazi dira. Itogarria suertatu ez dadin, informazioa aukeratu egin behar izaten dugu, lagungarriak zaizkigu lan honetarako jario irakurleak. Hala ere, interesatzen zaiguna eta ez, ezagutu eta sailkatu behar dugu. Etorkizunean, sareratzen den informazioa semantikoki sailkatuko omen den arren, geroko web 3.0k ez du konponduko informazio larregi jasotzeak eragin lezaken intoxikazioa, hau da, infoxikazioa. Konponbidea: informazioaren erabileran alfabetatzea?

GNU/Linux banaketen jatorri-zuhaitza

Gaur egun arte hainbat GNU/Linux banaketa izan dira. Guztiak aipatzea ezinezkoa izango litzateke lau lerro hauen bidez. Beraz, berriaren izenburuan klikatu eta agertuko den genealogia-zuhaitzean kaleratu diren banaketa garrantzitsuen ibilbidea azalduko zaizue. Banaketa bakoitzaren oinarria, hasierako aztarnak eta garapena ezagutzeko modu grafikoa eta erraza.

Mozilla Gehigarrien web gunea euskaraz

Mozilla fundazioak bere produktuentzako gehigarriak biltzen dituen web gunea aurkeztu zuen orain dela gutxi. Hobekuntza ugari egin dituzte erabiltzaileek behar dutena berehala aurkitzeko helburuarekin. Librezale.org-en aipatzen duten bezala, berrikuntza nabarmenetarikoa izan da, web gunea hizkuntza desberdinetara itzultzeko aukera. Hori dela eta, Librezalekoak euskarara itzuli dute gunea, euskal komunitateak gustuko dituen gehigarriak eskuratzeko inongo arazorik gabe.

e-learning, b-learning eta m-learning

Karrajua.org-en m-learning zer den ezagutu dugu. Orain arte entzun izan ditugu kontzeptu batzuk: "e-learning", "e-informazioa", "e-dokumentazioa", "e-administrazioa", ..., guztiak Interneteko zerbitzu, baliabide, egitasmo edota sarean informazioa eskuratzeko moduarekin lotuta daude. M-learning, gutxi gorabehera, edozein tokitan izan daitekeen gailu mugikorren bidezko irakaskuntza da. E-learning bezala, birtuala da, baina ordenagailua erabili beharrean: mp3/4/5-ak, eskuko telefonoak, iPod-ak eta PDA-k erabiltzen dira. Tartean aurkitzen da B-learninga: saio presentzialak eta modu birtuala uztartzen dituen irakaskuntza.

Ubuntu Tribe: leihoa pinguinoarekin maitemindu zenekoa

Ubuntu Basque Tribe elkarteak, Andoaingo Sarobe Zine eta Bideo Eskolako ikasle batzuen laguntzarekin, landu duen film proiektu baten berri eman digu: Ubuntu Tribe laburmetraia. Ekimenaren web gunean azaltzen denez: Ubuntu Tribe ez da laburmetraia soilik, laburmetraia hasiera besterik ez da. Filma software askea garatzen duen euskal komunitatean oinarritua dago eta ziberkomedia erromantiko erdi dokumentala da, baita aldarrikatzailea ere. Laburmetraia, oraindik garapen egoeran dago eta Creative Commons lizentziapean banatuko da sarean. Izan ere, Ubuntu Tribe ekimenak copyrightik gabeko sormena elkartrukatzeko gunea izan nahi du, arte ideien zirkulazio askea bultzatuko duen esparrua, bide komertzialetatik haratago.

ITerating: kode irekiko programen direktorioa

www.iterating.com kode irekiko programen direktorio bat da. Gaur egun, gutxi gorabehera, 16.600 produktu ditu eta euskarazko bertsioak dituzten programak ere badaude. Bertan denetarik aurki ditzakegu, aplikazio entzutetsuenetatik: Joomla, Wordpress,... zehatzagoetaraino: CAD diseinuzko programak, adibidez. Programak sailkatuta azaltzen dira eta erabiltzaileen ebaluazioa jasotzen dute, hots, irakurleek aplikazioei buruzko iruzkinak eta balorazioak egiten baitituzte.

Software Librearen Astea Tuteran

Dedalo Fundazioak eta Riberlug Erriberako Linux erabiltzaileen elkarteak antolatuta, apirilaren 23tik 28ra Software Librearen Astea egingo da Tuterako Zibergunean. Sarrera librea da eta bost hitzaldietan, besteak beste, segurtasun kopiak nola egin software librearekin eta PC-a nola birziklatu software askearekin azalduko dute. Horrez gain, apirilaren 27an III. Tudela Install Party-a (III. TIP) ospatuko dute.

Informatikari Euskaldunen Bilkura: IEB2007

Maiatzaren 10ean, Donostiako Miramongo Teknologi Elkartegian, Informatikari Euskaldunen VI. Bilkura ospatuko da. Gai nagusia Web 2.0 izango da, bi ikuspuntutik aztertua: web 2.0-ren teknologiatik zein filosofikoaren alorretik. Gaiaren inguruan jardungo duten hizlari adituez gain, web 2.0 tresnak erabiliz izandako esperientzia aberasgarriak eta azken aldian garatu diren aplikazio berriak bilkurako parte hartzaileei azaltzeko aukera ere izango da.

NMAP eta SVN tutorialak

Euskalsource gunean euskaraz idatzitako informatika tutorialak topa daitezke. Azkenak: "Nmap -ekin sareak aztertzen" eta "Svn nola erabili" tutorialak dira. Gida hauen bidez, NMAP, SVN, eta Counter Strike zerbitzari baten instalazioaren nondik norakoak azaltzen dira. SVN, CVS sistemaren jarraipena da, software proiektuetan lan taldea errezten duen bertsio sistema bat da eta softwarearen azken bertsioa lortzeko sistema bezala erabiltzen da, Sourceforge gunean dauden proiektuetan egiten den moduan. Bestalde, NMAP-i buruzko tutorialean aukerarik esanguratsuenak aztertzen ditu eta helburu ezberdinak lortzeko ariketak proposatzen dira bertan.

Firefoxen hedapenaren datuak

XiTi aholkularitza enpresa frantziarrak emandako azken datuen arabera, oraindik Internet Explorer da nagusi internauten artean. Izan ere, europarren %25k erabiltzen dute Explorer. Europan zehar Firefoxen erabilera datuak honakoak dira: Frantzian %22,3k, Espainian %15,7k eta Alemanian %36k erabiltzen dute kode irekiko nabigatzailea. Kaleratu dutenez, Europa erdialdean eta iparraldean zabalpen handiago du Firefoxek. Eslovenia eta Finlandian, adibidez, dagoeneko erabiltzaile gehiago ditu Mozillaren nabigatzaileak. Gaur Euskarazko Software Katalogoko erabiltzaileen datuak aztertu ditugu eta emaitzak hauexek dira: Softkaten erabiltzaileen %52,8k Explorer erabiltzen dute eta %30,7k Firefox.

Folksonomia = Taxonomia demokratikoa

Ander Aranberri eta Josu Mendicute EHUko ikasleak dira. Ikus-entzunezko Komunikazioa ikasten ari dira eta Dokumentazio Informatibo irakasgaian, folksonomiari buruzko lan bat egin dute. Etiketen bidez sailkapen kolaboratiboak egiteari buruz landu duten azalpena ikus dezakezue: www.slideshare.net/mendicute/folksonomiak/1. Ikasle biak egindako lanaren ondorio nagusia hauxe da: "Hortaz, folksonomia = taxonomia demokratikoa."

Ubuntu Basque Experience

Josu Orbek (http://jorbe.blogsome.com/erregea/), Politeknika Ikastegia Txorierriko irakasleak, Ubuntu Basque Experience proiektua sarean jarri du. Ubuntu GNU/Linux euskarazko erabiltzaile moduan izan dituen esperientziak jakinaraztea nahi ditu eta apunteak denon eskura jartzea, edonorentzat erabilgarriak izateko. Beraz, Ubuntu GNU/Linux euskaraz erabiltzen dutenek topagune eta laguntza toki berri bat dute zalantzak eta arazoak denen artean argitzeko.

Meebo: hainbat mezularitza-sistemarako sarbidea

Internet bidezko mezularitza ohikoa da, batez ere, gazteen artean. Sistema hauek aldi bereko solasaldia eskaintzen dute, hau da, txat moduan aritzeko bat-bateko mezularitza-sistemak dira. Hainbat aukera daude mezularitza egiteko: Yahoo, MSN, GoogleTalk,... eta bakoitzak bere aplikazio eta protokoloak dituzte. Orain, Meebo web gunea erabiliz gero, edozein sistemara konektatzeko aukera dugu. Meebo-ren bidez munduko edozein tokitan eta edozein ordenagailutatik norberaren mezularitzako kontuetara konekta daiteke, kontaktuko datu guztiak berreskura daitezke eta ohiko solasaldiak arazorik gabe egin daitezke. Web gunearen interfazea euskaraz ere badago.

Hezi Top: e-learning askea eta doakoa bultzatzeko komunitatea

Donostiako Axular Lizeoaren esku, hezitzaileen esperientziak trukatzeko topagunearen berri izan dugu: Hezi Top (http://www.axular.info/hezitop/). Egitasmo honen helburua, guztiontzat e-learning askea eta doakoa bultzatzea da, on line ikastaroak sortzeko doako web espazioa eta laguntza emanez. Ikastaroak sortzeko Moodle jarri dute erabiltzaileen eskura eta gauza bakar bat eskatzen digute erabiltzaileoi: ikastaro irekiak egitea, nahi duenak sartzeko, erabili eta materiala kopiatu eta aldatu ahal izateko, beti ere iturria aipatuta. Hezit Top-en web gunearen edukia Creative Commons lizentziapean dago.

Euskararen presentzia Internet-en

Sustatuk, orain dela hilabete batzuk, honako berria jakinarazten zigun: "Interneten 166.100 internautek erabiltzen dute euskara EAEn." Eustatek kaleratutako azken datuen arabera 2006ko lehen hiruhilekoan internauten %22ak euskaraz nabigatzen zuten. Inkestan ez zen kaleratzen zenbatek duten nabigatzailea euskaraz konfiguratuta. Sustatuk, ideia bat egiteko, euren irakurleetariko zenbatek duen nabigatzailea euskaraz konfiguratuta esan zigun: "Sustatuko erabiltzaileen %30ak bakarrik du konfiguratuta nabigatzailea euskaldun gisa." Euskararen presentzia Internet-en zenbatekoa den osatzea nahi izanez gero, Euskarazko Software Katalogoko Behatokira jo dezakezue. Martxoan berritu dira datuak eta begirada azkarra emanez gero, presentzia ez dela ugaldu ikus dezakezue.

Sinadura digitala, tramiteak Internet-etik egiteko. Erabilgarria ote da?

Aurreko asteetan irakurri izan dugunez, hainbat udaletxek ahalbidetu dute tramiteak Internet-etik egiteko aukera. Besteak beste, Basaurikoak eta Eskoriatzakoak. Eskoriatzako Udalak, adibidez, herritarrei Internet bidez kontsulta zein ordainketa zerbitzuak eskaintzen die: bizileku-ziurtagiriak eskatzea, bizikidetzako ziurtagiriak, ordaintzen diren tasak eta zergen ordainagiriak. Guzti hau, identifikazio pertsonala ematen duen IZENPE txartelarekin egiten da, hau da, sinadura digitala eskuratzeko eskatu beharrezkoa den txartelarekin. Baina, aukera honen inguruko zalantzak argitaratu ditu Mikel Larreategi, informatikari eibartarrak. Bere blogean aipatzen duenez (http://eibar.org/blogak/erral), ez du uste jendeak erraz uler dezakeenik sinadura digitalaren bidez, identifikatzen gaituzten txartelaren nondik norakoak, ezta asko erabiliko direnik. Izan ere, "teknofiluek eta sistemia zelan dabilen dakixan jente asko be oso eszeptikua baita karnet horren inguruan." Denborak emango digu erantzuna. Bitartean, apusturik egin nahi duzue?

Ikastarrotza: zientziaren irakaskuntza teknologia berrien bidez eta euskaraz

Txomin Villarroel, EHUko Gasteizko Irakasleen Unibertsitate Eskolako irakaslea da. Matematikaren didaktika irakasgaia lantzen du. Aurretik institutuko irakaslea izan da eta betidanik, irakaskuntza eraginkorrago bat lortzeko bideak uztartzen ibili da. Bere lanaren emaitzak ikus ditzakegu bere blogean: Ikastorratza (http://ikastorratza.civiblog.org/blog). Berriak, webquestak, esperimentuak, softwarea, matematikako baliabideak, argitalpenak, argazkiak ..., emaitzak guztion eskura.

GISA: Gipuzkoako Software Askearen Elkartea

2005eko udan sortu zen elkartea. Sortzaileak informatikako Euskal Party izeneko topagunean bildutako partaide batzuk izan ziren. Lau kide dira elkarteko motorra, baina laguntzaile ugari ere dituzte. Eta, leku ezberdinetan bilatu ondoren, erosi dute aurrerantzean elkartearen lokala izango dena. Lokalaren bitartez Oarsoaldeko herritarrekin harremana estutu nahi dute, dituzten ideiak eta proiektuak partekatuz. Ikastaroak emateko asmoa dute, baina Interneten nabigatu nahi duen oro ere joan daiteke elkartearen egoitzara. Hona hemen, elkartearen helbidea: Kaputxinoak auzoa, Sorgintxulo kalea, 9-behea, Errenteria eta e-posta: kontaktua@gisa-elkartea.org

Google: Bilaketa emaitzetan lehena izateak arazoak dakartza

Google bilatzailearen bidez egiten dira bilaketa gehienak. 2005ean sarean egin ziren bilaketen % 50 Google baliatuz egin ziren (iturria: Onestat.com). Hau dela eta hainbaten, Google bezalako bilaketa-tresnen emaitzetan, presentzia ugaltzea izaten da gure asmoa. Hala ere, Google-n emaitzetan lehena izateak arazoak ekar ditzake. 2004an, Merodeando blogean (www.merodeando.com) SGAE-ri buruzko mezu bat kaleratu zen. Izenburua hauxe zen: "SGAE=ladrones". Gaur egun, Google-n "ladrones" hitzari buruzko bilaketa eginez gero, lehen postuan blog horretan aipatutako mezua agertzen da. Horregatik, blogaren egileak, SGAE-tik mezua ezabatzeko "gonbitea" jaso du.

Moodle Doc-ak Euskaraz

Santurtziko Udal Euskaltegiak Moodle Doc-ak Euskaraz egitasmoaren lehen fasea amaitutzat eman du. Proiektuaren helburua Moodle plataforma telematikoari buruzko dokumentaziorako gunea osatzea izan da. Momentu honetan, Moodle Doc-ak Euskaraz guneak 283 orri ditu eta horietan oinarrituta, tutore birtual lanetan hasi nahi duen edozeinek, Moodle-ren bitartez ikastaro bat sortu ahal izateko beharrezko datu eta ohar guztiak eskuratu ahal ditu. Bestalde, Moodle Doc-ak Euskaraz oso-osorik deskarga daitezke norberaren ordenagailura eta offline erabili.

15 eta 16 urteko ikasle frantsesei USB giltzak oparituko dizkiete

Frantziako Ile de France Eskualdeko Kontseiluak software librearen ezagutza sustatu nahi du gazteen artean. Hori dela eta, bertako agintariek 175.000 ikasleen artean, software askeko programekin hornitutako USB giltzak oparitzea erabaki dute. Besteak beste, Firefox nabigatzailea, Thunderbird posta elektronikoa eta OpenOffice bulego aplikazioen paketea eskuratuko dute gazteek. Dena dela, ezagutaraziko den softwarea Windowns sistemarekin bateragarria da, ikasle gehienek darabilten sistema baita.

Allth.at metabilatzaile nekaezina

Metabilatzaileak bilaketa-tresna anitzetan batera egindako araketen emaitzak kaleratzen dituzte. Horietako bat da Allth.at. Hala ere, metabilatzaile honek badu zerbait berezia, bilatzaile nekaezina dela. Bilaketak egiten ditugunean, momentuan nahi izaten ditugu emaitza emankorrak eta ez baditugu izaten, bilaketa berehala baztertzen dugu sarri askotan. Allth.at-en bidez, bilaketa-tresna gustukoak edo egokiak aukeratu eta gehitu ditzakegu. Bilaketen emaitzak, aukeratutako bilatzaile-tresna besteko fitxa kopuruetan azalduko zaizkigu. Lehengo fitxan, bilaketa-tresna guztien emaitzak agertzen direlarik. Bilaketak ez badigu eman nahi duguna, jarraitzeko agindua eman ahal diogu eta emaitza postontzian jaso dezakegu edota rss harpidetzaren bitartez. Lo gaudela ere, Allth.at-ek lanean jarraituko du, guk eman dizkiogun arauen araberako bilaketa burutzen.

Openaldia 07: software askearen festibala

Openaldia 07, martxoak 1 eta 2an ospatuko da Edonostia.net Loiola Teknologia Berrien Zentroan. Openaldiak, software askearen definizio ulerkorra eskaini nahi du, horretarako ez dira bakarrik aplikazio informatikoak erakutsiko, baizik eta: erakusketak, hitzaldiak, software askearen bitartez eginiko filmak, musika askez beteriko festa, lehiaketak, ...antolatuko dira. Bestalde, bi cd dituen Libre Nabegatu bilduma sortaren 5000 ale banatuko dira: lehenengo cd-ak Windows sisteman erabili daitezkeen software askeko programen aukeraketa biltzen du, eta bigarrena Linux/GNU Kubuntu distribuzioa da.

"Paper elektronikoa" ekoitziko duen enpresa zabalduko dute Alemanian

Pantaila malguak sortu dituen Plastic Logic enpresa britainiarrak "paper elektronikoa" edo "e-paper" izeneko pantailak ekoitziko ditu Alemanian. Dresden egoitza izango duen lantegia 2008an hasiko da lanean eta bertan pantaila elektroniko malguak eta xeheak ekoitziko dituzte, hau da, paper elektronikoa. Pantaila malguetan erabiltzaileek, Internet-eko hari gabeko konexio baten bitartez edo USB bidez, egunkari, aldizkari eta liburuen edukia deskargatu ahal izango dute. Enpresako arduradunek adierazi dutenez, edonon gaudelarik ere, ohiko papera irakurtzea bezala izango da paper elektronikoen irakurketa, guztiz erosoa izango baita.

Hezkuntzarako baliabideak euskaraz: geografiako moduluak

Aspaldian, hezkuntzarako euskarazko baliabideen berri jaso izan dugu. Aurreko baten fisikako flash animazioak izan ziren, handik gutxira jakin dugu geologiako gaiak jorratzen dituzten flash animazioak euskaraz aurki daitezkeela Kare Kullerud, Norvegiako Tromso Unibertsitateko Geologia Departamentuko irakaslearen web gunean. Kasu honetan ere, Axular Lizeoa Ikastolako irakasleak izan dira moduluak itzuli dituztenak. Momentuz 4 modulu euskaratuta daude: magmatismoa, adin absolutuaren zehaztapena, lurrikarak eta lurraren baliabideak.

gvSIG 1.0: Geografia Informazioko Sistema aplikazioa euskaraz

Geografia Informazioko Sistema (GIS) motako aplikazioa kaleratu berri dute Valentziako Generalitateak, Jaume I Unibertsitateak eta IVER enpresak. Aplikazioa gvSIG 1.0 deitzen da, dohainik banatzen da GPL lizentziapean eta, besteak beste, euskarazko interfazea du. Software librean garatutako aplikazio hau Arabako Foru Aldundiak euskaratu du. Arloko edozein profesionalek eta erakundek erabiltzeko garatu duten informatika tresna honek espazioa erreferentziatzat duten datuak kudeatzen ditu, tokikoak zein urrunekoak, eta osotara aztertzeko balio du.

Fisikako Flash animazioak euskaraz

IKTeroen eskutik jakin dugu, David Harrison, Kanadako Toronto Unibertsitateko Fisika Fakultateko irakaslearen web gunean, fisikako gai orokor batzuk jorratzeko interesgarriak izan daitezkeen animazioak eskura daudela. Interesgarriena da, fisikako gaiak jorratzen dituzten hainbat flash animazioak euskaraz ere aurki ditzakegula (90 inguru). Animazio batzuk sinpleak dira, beste batzuk konplexuak. David Harrison irakaslearen animazioen euskarazko bertsioa, Donostiako Axular Lizeoko irakaslea den Xabier Larretxeak egin ditu.

Web 2.0 esanahia bideoz azalduta

Web 2.0 kontzeptuaren inguruan piztu den jakin-mina nabaria da. Zer da Web 2.0, zeintzuk diren ematen dituen aukerak, nolako baliabideak sortu diren inguruan, ... . Kontzeptuaren edukia gizarteratzeko ikastaroak ere antolatzen dira (adibidez: UEUren eskutik "WEB 2.0" ikastaroak edota orain dela egun batzuk atal honetan komentatu genuen "Hizkuntza lanabesak amaraunean" ikastaroa.) YouTube-n Michael Wesch-en, Kansas State University-ko Antropologia irakaslea, bideoa aurkituko duzue. Lau minutu eskasean Web 2.0 zer den azaltzen du. Ingelesez dagoen arren aurkezpen interesgarria eta ulerterraza.

Quintura: etiketa bidezko bilatzailea

Quintura (www.quintura.com)web 2.0 motako bilatzailea da eta edozein terminoren inguruan sarean zer dagoen adieraziko digu. Bilaketa ez da irizpide estatikoen araberakoa izaten, ordea. Bilatzeko hitz bat idatzi eta horren inguruko etiketa-lainoa azaltzen zaigu. Bertan nabarmenduko da idatzitako hitzarekin tag-en bitartez lotutako hitz-multzoa. Horietako bakoitzean klik egindakoan, bilaketaren emaitza zehatzagoa lortuko dugu. Bestalde, etiketa-lainoaren azpian ohiko bilatzaile batek emango lizkigukeen emaitzak ere izango ditugu. Emaitzok aldatuko dira etiketa-lainoan termino bat edo beste bat aukeratzen dugunean.

Google-n agertzeko zer egin behar dugu?

Hau da Taperware kolektiboak bidalitako galdera Marrapuntu.org-ra. Izan ere, bloga ireki berri dute (http://taperwarekolektiboa.blogspot.com), baina ez omen dute inondik ere lortzen Google eta antzeko bilatzaileetan agertzea. Guztiontzat interesgarria da holako tokietan egotea. Web guneen eta blogen ikusgarritasuna areagotzen du bilatzaileen emaitzetan presentzia izateak. Horregatik, bilatzaile horietan presentzia izateko zer egin behar den galdetzen dute Taperwarekoek. Erantzuna, Marrapuntu.org-en.

Web 3.0 belaunaldia

Web 2.0 kontzeptua barneratzen hasi berriak garenean, Sareko Argiako artikulu baten Web 3.0 belaunaldi berriaz hitz egiten ari dira jada. Noiz iritsiko ote den ez dakigu, baina Jon Torner kazetariak zein ezaugarri izango dituen, gutxi gorabehera, adierazten du bere artikuluan. Funtsean, Web 3.0 belaunaldiak urrats berria emango luke. Makina "adimendunek" egunero sareratzen diren edukiak modu semantikoan (sailkatutako etiketen arabera) indexatzeko gai izango dira. Web belaunaldi berriari web semantikoa deitzen diote. Kontzeptuak, Interneten dabilen informazioari meta-datu semantikoak batzeari egiten dio erreferentzia. Honenbestez, sarea, katalogoa baino gida bat izango da, datu-base globala.

Aireratu! Ikasleak eta irakasleak landutako web gunea

Ikasleak eta irakasleak landutako web gunea da Aireratu! Tolosaldea Goi-mailako Lanbide Heziketako Institutuko, Informatika Sistemen Administrazio Prestakuntza Zikloko ikasle eta irakasleek garatu dute. Azaroan hasi ziren euren lana kaleratzen eta denon esku jarri nahi dituzte bertan sortzen dituzten informatikari buruzko artikuluak eta eskuliburuak. Gaur egun, argitaratu dituzten lanak Internet-eko segurtasunari lotuta daude eta besteak beste, dokumentuak zifratzeko eta deszifratzeko PGP programaren instalazioa azaltzen dute.

Irakaskuntza telematikoa aztergai

Egunotan ikusi dugu euskarazko zientziak baduela bere tartea Internet-en. Besteak beste, horren adibideak dira, EHUn Biologia ikasketak egiten dituzten bost gaztek osatzen duten www.euskalnatura.net ataria eta Alex Fernandez Muerza zientzia kazetari bilbotarrak, bultzatu duen www.gazte-zientzia.com, ikasle gazteei zuzendutako web gunea. Zientzia eta teknologia gaiak euskaraz zalbatzeko bide eraginkorra da sarea. Ezagutza ahalbidetzeko beste bide bat ere lantzen ari da aspaldi honetan: irakaskuntza telematikoa. Hainbatek martxan jarri dituzte online irakaskuntza bultzatzeko baliabideak. Unibertsitateak ere horretan dabiltza. Honen inguruan, MUn Psikopedagogia online ikasten ari den ikasle baten elkarrizketa duzue IKTak aztertzen dituen blog honetan http://www.unibertsitatea.net/blogak/ikt/. Bertan, mota honetako irakaskuntzaren alde onak adierazten dira: malgutasuna, independentzia, kudeaketan parte-hartze dinamikoa. Baina, era berean, beste zailtasun batzuk adierazten dira. Interesgarria.

Hizkuntza lanabesak amaraunean ikastaroa

Urtarrilaren 31tik apirilaren 25arte Mungiako Legardalde Herri Ikastetxean, "Hizkuntza lanabesak amaraunean ikastaroa" emango dute IRALE programaren barruan. Bertan, Internet-i buruzko oinarrizko kontzeptuak argituko dituzte: web gunea, ataria, blog, bilatzaileak, software, software librea, sistema eragile, nabigatzaileak, posta zerrendak, spam, ... Web gune interesgarrien ezagutza: sustatu.com, erabili.com,... Ariketa praktikoak: posta zerrenda batean harpidetu... eta beste hainbat gauza. Internet-en hezkuntzarako baliagarriak diren tresnen ezagutza ahalbidetzen duen ikastaroa.

Blogak, wikiak eta hezkuntza

EHUko Leioako campusean iazko azaroan Web 2.0ri buruzko Nazioarteko I. Batzarra egin zuten. Bertan, software librearen garapenak eta Web 2.0k eskaintzen dituen tresnen etorkizuna hezkuntza arloan zein den aztertu zuten. Blogak eta wikiak irakasleen eguneko lanean ahalbidetzen dutena ikusi zuten partaideek eta orain, kongresuan esandakoak ezagutzeko aukera dago euren web gunean.

Otarrea: Unibertsitate alorreko dokumentuak partekatzeko gunea

Unibertsitatea.net atarian (www.unibertsitatea.net), gune interesgarri bat duzue: Otarrea. Bertan, unibertsitate alorreko lan, txosten, apunte eta bestelako dokumentuak partekatzen dira. Edozein formatutako dokumentuak onartzen dira eta kalitate bermea eskuratzeko aukera ere ematen dute. Besteen artean, informatikako hamar dokumentu daude bertan. Hainbat gai ikusi ditugu: blogak, web. 2.0, segurtasun informatikoa, programazio-lengoaiak. Dokumenturik izanez gero, hor duzue partekatzeko beste gune bat.

Richard Stallman-i elkarrizketa Hik Hasi aldizkarian

Informatika munduan oso ezaguna da Richard Stallman, software librearen erreferentea da. Sortu zenetik, Stallman software librearen komunitatea hedatzen ari da, ez bakarrik erabiltzaileari eskaintzen dizkion abantaila praktikoengatik, baizik eta, batez ere, erabiltzailearen askatasuna bermatzen duelako. Hik Hasi aldizkariaren azken alean (114.)Stallman elkarrizketatu dute. Software librea eta hezkuntzari buruz aritzen da: hezkuntzak duen zereginaz, ikastetxeek, irakasleek eta ikasleek software libreagatik egin dezaketenez eta baita software libreak haiengatik egin dezakeenaz ere. Bere hitzetan: "Software pribatiboak ikasleak menpean hartzen ditu. Software libreak, berriz, askatasuna ematen die."

MUko Software Askeko Taldea

Zabaldu.com-en irakurri dugu Deustuko Unibertsitateko Ingeniaritza Fakultatetik sortu dela Software Libreari buruzko blog berria. Bertara jo dugunean, I�aki Arenaza MUko irakaslearen mezu bat irakurri dugu, bertan azaltzen duenez Mondragon Unibertsitatean bi hilabete dela martxan jarri dute ere MUko Software Askeko Taldea. Moodle plataformaren bitartez ari dira lanean eta euren helbidea aldi baterakoa izan arren, aurrera jarraitzeko asmoa adierazi dute.

HPSk euskarazko itzultzaile automatiko bat sortzeko ekimena bultzatuko du

Hizkuntza Politikarako Sailburuordetzak 2007ko aurrekontua aurkeztu du. 2006ko aurrekontuarekiko %13,31ko gehikuntza izan du aurtengoak. Aurrekontuak garatuko dituen lan-ildo nagusienen artean IKTak daude. Informazioaren eta Komunikazioaren Teknologien arloan euskarazko itzultzaile automatiko bat sortzeko asmoak sortu du ikusmin handiena aurrekontuen aurkezpenean, baina egitasmoa ez da berria, Eusko Jaurlaritzak zenbait saio egin baititu euskarazko itzultzaile automatikoa sortzeko. �Baina ez dute aurrera egin�, gogorarazi du Baztarrikak. HPSk IKTen arloko enpresei gara ditzaketen proiektuen proposamenak eskatu dizkie, eta horiek jasotakoan zehaztuko dituzte itzultzaile automatikoa egiteko lehiaketaren baldintzak. 300.000 euro gastatuko dituzte aurten itzultzaile automatikoan.

Euskalbar gehigarriaren iturburu kodea guztion esku

Mozilla Firefox nabigatzailearekin euskarazko hiztegi eta itzultzaileetan kontsultak egitea errazten duen Euskalbar gehigarriaren 1.9 bertsio berria argitaratu dute. Bertsio berriarekin batera, iturburu kodea kaleratu du egileak, nahi duenak bere ekarpenak egin ditzan.

boroPress: blog eta web guneak sortzeko WordPress euskaraz

Borobilaren eskutik (domeinuak erregistratzeko eta web guneak ostatatzeko zerbitzua) boroPress, euskaldunen WordPress-a kaleratu dute. WordPress-en azken bertsioa euskaratu ondoren, 29 itxura eta 7 plugin gehitu diote eta emaitza boroPress izenarekin kaleratu dute. Euskarazko blog edo web gune bat sortu nahi izanez gero, boroPress erabil dezakegu. Euskaraturik dago eta beste hainbat abantaila eskaintzen ditu.

Software-erakusketa

Informatikari Euskaldunen VI Bilkura ospatuko dute 2007an, apirilean aurreikusten dute gutxi gorabehera. Ekitaldiaren gai nagusia Web 2.0 izango da eta antolatzaileek bloga zabaldu dute: http://www.unibertsitatea.net/blogak/ieb_07/. Bertan adierazi dutenez, bilkuraren egunean euskaraz garatutako edozein klaseko software-produktuak aurkezteko beta ere izango da eta euskarazko softwarea ekoizten duen edonori, bilkuran parte hartzeko gonbidapena luzatu diete.

Software itzulpenak web bidez egiteko zerbitzua ireki du Librezale.org-ek

Librezale euskarazko softwarea sustatzeko taldeak, zerbitzu berri bat ireki du, edozeinek web bidez proiektu ezberdinen itzulpenean lagun dezan. Zerbitzu hori pootle zerbitzari baten instalazioa da eta honen bidez, orain artean egindako eta egiten ari diren itzulpen lanen bilduma sortu dute, komunitateak itzulpen memoria edo kontsulta moduan erabili dezan. Bestetik, itzulpenak web bidez egiteko aukera eskaintzea, software librea itzultzen lagundu nahi duen edonori irekita dituzten lanetan laguntzeko aukera bat emanez.

Informatika ikasleak ez dute web 2.0 ezagutzen?

Ander Go�i, blogaria eta Danobat enpresako lankidea, Arrasateko Eskola Politeknikoan egon zen abenduan software proiektu kudeaketari buruz hitz egiten. Entzuleak ingeniaritzako bigarren mailako informatika ikasleak izan ziren eta hitzaldiaren edukia, egun ahoz-aho dabiltzan wiki, blog, folksonomia eta abarrek, makina-erreminta moduko enpresa batean izan dezaketen erabilpenaz aritu zen. Anderrek bere harridura azaltzen du bere blogean, entzuten ari ziren 20-22 urteko gazteen gehiengoak del.icio.us, google-maps, zabaldu, tagzania, flickr eta halakoak ezagutzen ez zituztelako.

Sareko Euskarazko Produktuen Katalogoa

Bizkaiko 26 udaletako Euskara Zerbitzuek sustatuta, Sareko Euskarazko Produktuen Katalogoa kaleratu da. UEUk osatu du, Euskaltelek babestu eta Eusko Jaurlaritza, Bizkaiko Foru Aldundia eta Alkarbideren laguntzaz argitaratu da. Katalogoaren helburua 16 eta 26 urte bitarteko gazteei Internet-en dauden euskarazko produktuak hurreratzea da. 77 erreferentzia bilduta daude: euskarazko softwarea, baliabideak, blogak euskaraz egiteko tresnak, denbora-pasarako jolasak, txateatzeko guneak, aldizkari elektronikoak eta beste hainbat guneri buruzko informazioa kaleratzen da. Katalogokoak liburuxka formatua du eta CD batekin batera banatuko dute gazteen artean. Guztira 18.000 ale banatuko dira.

Sarean ustekabeak?

IKTeroak beraien blogean adierazi zuten abenduaren 12an, arakatze lanak egin ondoren, ustekabean, Lagun 2.0 izeneko gune bat aurkitu zutela. Bertan, poloniera-euskara eta euskara-poloniera hiztegia aurkitu zuten. Egun bat beranduago, Sustatun, I�aki Irazabalbeitiak bere semeak aurkitu duen euskarazko joko baten berri ematen digu eta hau nola harritu zen, euskaraz zela baieztatzerakoan. IKTeroak eta baita Irazabalbeitiak aurkikuntzen inguruko sorpresak aipatzen dituzte. Internet-en zerbait euskaraz aurkitzeak harritu egiten gaitu oraindik?